Khutbah Jumat Bulan Syawal Bahasa Jawa

Nglestareken Nilai-Nilai Ramadhan

الحمد لله المحمودِ في كل أوان، المعبودِ بحقٍّ في كل الزمان، الذي يَخْضَعُ لعَظَمَتِهِ الملائكةُ والإنسُ والجانُّ، اللهم صلي علي سيدنا محمّدِنِ المختار وعلي آله وأصحابه الأخيار، ومن تبعهم بإحسان الي يوم الدين مَا شَعَّتِ الأنوارُ ، وَمَا غَرَّدَتِ الأطْيار. أَمَّا بَعْدُ، فَإِنِّي أُوْصِيْكُمْ وَنَفْسِيْ بِتَقْوَى اللهِ الْقَائِلِ في مُحْكَمِ كِتَابِهِ: مَنْ جَاءَ بِالْحَسَنَةِ فَلَهُ خَيْرٌ مِنْهَا وَهُمْ مِنْ فَزَعٍ يَوْمَئِذٍ آمِنُونَ، وَمَنْ جَاءَ بِالسَّيِّئَةِ فَكُبَّتْ وُجُوهُهُمْ فِي النَّارِ هَلْ تُجْزَوْنَ إِلَّا مَا كُنْتُمْ تَعْمَلُونَ (النمل: ٨٩-٩٠ )

Para sederek jama'ah Jum'ah rahimakumullah,

Minangka purwakaning atur keparenga kula ngajak dateng awak kula kiyambak lan panjenengan sedaya, mangga sami kita tingkataken taqwa kita dumateng Allah, kanti ngestokaken dawuh dawuhipun , lan nebihi sedaya awisanipun. Inggih namung kanti taqwa dumateng Allah punika kita bade kaparingan rahmat lan kawilujengan  gesang  saking ngarsa Dalem Allah Ta’ala, wiwit gesang ing alam dunya punika ngantos mbenjang dumugining akherat, Amiin. 

الَّذِينَ آمَنُوا وَكَانُوا يَتَّقُونَ * لَهُمُ الْبُشْرَى فِي الْحَيَاةِ الدُّنْيَا وَفِي الْآخِرَةِ لا تَبْدِيلَ لِكَلِمَاتِ اللَّهِ ذَلِكَ هُوَ الْفَوْزُ الْعَظِيمُ

"ًWong wong kang pada iman lan pada taqwa, tumrap wong wong mahu kabungahan ing ndalem panguripan dunya lan akhirat, ora ana owah owahan kanggo janjine Allah, Kang mengkono mau minangka kabegjan kang agung”  *QS.Yunus : 63-64).

Hadirin ingkang dipun rahmati Allah,

Sederingpun Ramadhan, kito sedoyo ngarep-arep datengipun kanti ati ingkang bronto. Sak meniko sesampunipun Ramadhan nilar kito sedoyo, monggo kito muhasabah utawi ngenget-enget maleh menopo mawon ingkang sampun kito lampahi sak lebeting wulan mulyo meniko. Menawi kita sampun nglampahi kesaenan monggo kito jagi lan kito tingkaten amalan sae meniko. Menawi kito kagolong tiyang ingkang lirwo, monggo kito enggal-enggal taubat kanti taubatan nasuha.

Sianoso wulan Ramadhan ingkang kebak ampunan lan rahmat soho ganjaran ingkang dipun tikel-tikelaken sampun kliwat, ananging wekdal kangge ngibadah lan ngamal sae mboten badhe lingsir ngantos malaikat Izroil mapak kito medal saking ngalam ndunyo meniko.    

Ngibadah siyam lan qiyam, sedekah lan sanesipun tetep dipun printahaken wonten ing sak njawinipun Ramadhan. Agami Islam maringi kesempatan dumateng kito nerasakan lan nglestantunakan ngibadah siyam. Rasulullah shallallahu ‘alaihi wa sallam paring dawuh dumateng kito supados sami siyam sunnah nem dinten ing wulan Syawal.

 مَنْ صَامَ رَمَضَانَ ثُمَّ أَتْبَعَهُ سِتًّا مِنْ شَوَّالٍ كَانَ كَصِيَامِ الدَّهْرِ (رَوَاهُ مُسْلِمٌ)

“Sopo wonge kang poso Ramadhan, nuli ngetut mbureni kelawan poso nem dino ing wulan syawal, mongko wong mau koyo poso sajerone setahun” (HR Muslim).  

Sanesipun poso syawal, taksih wonten poso sunnah Senin-Kamis, poso tigang dinten (al-ayyam al-bidh utawi poso padang mbulan) inggih meniko tanggal 13, 14 lan 15 tiap wulan, poso sunnah tarwiyah-arafah, poso wulan rejeb lan sanes sanesipun.

Rasulullah shallallahu ‘alaihi wa sallam ugi ndawuhaken supados kita nglampahi sholat dalu utawi qiyamul lail mboten namung ing wulan Ramadhan:

 وَأَفْضَلُ الصَّلَاةِ بَعْدَ الْفَرِيضَةِ، صَلَاةُ اللَّيْلِ  

“Saapik-apike shalat sakwuse shalat fardlu kuwi shalat bengi” (HR Muslim).

Shalat bengi meniko sholat nopo? Sholatul Lail meniko shalat sunnah ingkang dipun lampahi wonten ing wayah dalu inggih meniko milai sak ba’dane isya ngantos sedrenge fajar. Kados shalat ba’diyah isya’, witir, shalat sunnah mutlak lan tahajjud. Khusus sholat tahajjud meniko dipun lampahi sak sampune wungu saking sare sianaoso anggenipun sare namung sekedap. Kados ingkang kadawuhaken Habib Abdullah bin Alwi Al-Haddad wonten ing kitab Risalatul Mu’awanah wal-Mudzaharah wal-Muazarah: 

واعلم أن من صلى بعد العشاء فقد قام من الليل 

 “Ngertio, sak temene wong kang nglakoni sholat sawise shalat isya’, mongko wong mau kagolong wong kang nglakoni shalat bengi (qiyamul lail)”

Ananging ewo semanten Habib Abdullah ngendikan bilih shalat tahajjud langkung sae lan utomo. Allah SWT sampun dhawuh dumateng kanjeng Nabi Muhammad  wonten ing surat   (QS Al-Isra’: 79). 

  وَمِنَ اللَّيْلِ فَتَهَجَّدْ بِهِ نَافِلَةً لَكَ عَسَىٰ أَنْ يَبْعَثَكَ رَبُّكَ مَقَامًا مَحْمُودًا  

“Lan ono ing sebagian wengi, tahajudo siro minongko ngibadah tambahan kanggo iro, menowo-menowo Pengeranmu ngangkat siro ing pangonan kan pinuji”

Ma’asyiral Muslimin rahimakumullah,

Sak sampunipun Ramadhan, monggo kito kiyataken iman kito kanti istiqomah nglampahi ngamal sholeh lan ngibadah. Sebab iman meniko badhe langkung kiyat utawi ringkih wonten gandheng cenengipun kaliyan anggen kito nglampahi kesaenan utawi kemaksiatan. Menawi kito tansah nglampahi kesaenan, iman kito badhe sangsoyo kiyat. Kosok wangsulipun menawi kito tansah nglampahi maksiat, iman kito badhe sangsoyo ringkih.

Lan sinaoso ngamal sae sekedhik ingkang dipun lampahi kanti istqomah, meniko langkung sae tinimbang ngamal sae kathah ananging mboten dipun sarengi kaliyan istiqomah. Rasulullah shallallahu ‘alaihi wa sallam dawuh:

   أَحَبُّ الأَعْمَالِ إِلَى اللهِ أَدْوَمُهَا وَإِنْ قَلَّ (أَخْرَجَهُ الْبُخَارِيُّ وَمُسْلِمٌ)

“Saapik-apike penggawean miturut Allah kuwi amalan kang dilestareake senajan mung setitik. (HR al-Bukhari dan Muslim).  

Poro rawuh.... akhiripun, mugi-mugio kita kalebetaken golongan tiyang-tiyang ingkang istiqomah nuhoni kwajiban ngumawula dumateng Allah hinggo wusananipun pikantuk ridlanipun Allah Ta’ala. Amin ya Rabbal Alamin.

أَقُوْلُ قَوْلِيْ هٰذَا وَأَسْتَغْفِرُ اللهَ لِيْ وَلَكُمْ، فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.